Un guia tocante e uzo corecto di Papiamento den e practica di periodismo

Den un mundo di informacion lihe y cu alcance global ta fundamental pa nos como periodista mantene un nivel halto di profesionalismo linguistico. Cu esaki den mente, RAPP – Manual di Estilo pa Periodista ta bay keda presenta pronto como un recurso pa duna guia tocante e uzo corecto di Papiamento.  

E guia aki no ta solamente pa promove un comunicacion cla y efectivo, sino tambe pa promove y conserva nos idioma Papiamento. 

E destinarionan principal di e manual aki ta e periodistanan, redactornan y corectornan den prensa, cu tin un rol crucial pa preserva y eleva e nivel di nos idioma. Storianan y relatonan bon skirbi no ta solamente mas facil pa compronde, sino tambe ta yuda pa lanta confianza di e lector. 

E “Manual di Estilo” ta cubri diferente tema linguistico – for di ortografia y gramatica, erornan comun den e medionan di comunicacion te con pa skirbi tocante temanan sensibel manera violencia di genero y suicidio.  

Ademas, ta haci referencia na material di apoyo, manera “Vocabulario Ortografico di Papiamento” di Departamento di Enseñansa y otro manualnan existente tocante e idioma Papiamento pa percura pa un bon uzo di e idioma, segun e ortografia actualisa. 

E meta di Red Arubiano di Prensa Profesional (RAPP)ta pa trece un manera standard den e forma di comunica pa asina profesionalisa e sector periodistico na Aruba. 

Nos ta spera cu e manual aki por sirbi como un herment pa e periodistanan por mehora nan skirbimento y representacion linguistico, mientras cu ta reforsa nos identidad cultural den tur canal di comunicacion. Keda pendiente!.