Grupo di periodista hende muhe a participa den tayer di RAPP

Cu e obhetivo di conmemora e Dia Internacional di Hende Muhe, Red Arubiano di Prensa Profesional (RAPP) a organisa un tayer especial titula ‘Reporting Safely for Women Journalists’. E tayer tabata dirigi na periodistanan femenino y tabata enfoca riba seguridad y bienestar mental den e campo di prensa.

E evento a tuma luga diasabra 15 di maart na Impact Hub Aruba, unda un grupo di periodista hende muhe a reuni pa comparti nan experiencia y siña estrategianan pa proteha nan seguridad fisico y salud mental.

Den nan trabou diario, hopi periodista ta enfrenta desafionan manera ‘online bullying’, discriminacion den trabou y cubrimento di temanan sensitivo manera corupcion politico y inhusticianan social. Esaki ta aumenta e riesgo di menasa, agresion y cansancio mental, creando un sensacion di aislamento profesional.

Seguridad, cuido personal y resiliencia

E tayer a duna participantenan un plataforma pa comparti nan experiencia y kibra e isolacion cu hopi biaha ta existe den e profesion. Tabata un oportunidad pa aprende hermentnan practico, maneha stress y desaroya strategianan pa enfrenta desafionan laboral.

E sesionnan tabata guia pa psicologo y coach Sabrina Sonensein, cu a duna participantenan capacitacion practico, tips pa mantene un salud mental fuerte y manera pa enfrenta menasanan cu por afecta nan trabou diario.

Agradecimiento y colaboracion

Un danki grandi ta bay na fundacion MamaCash, cu a contribui pa realisa e tayer aki. MamaCash ta un organizacion internacional cu ta apoya hende muhe den nan lucha pa derechonan, y e colaboracion cu RAPP ta reforza e meta di empodera periodista femenino cu conocemento y confianza den nan profesion.

Nos ta invita tur periodista na Aruba cu ta desea mas informacion tocante RAPP of ta interesa pa bira miembro pa tuma contacto via email: rapp.aruba@gmail.com.